همه واحنه والدكتاتورية -
سالني واحد ليش تكول ثوار ليبيا احسن منا (العراقيين) ، مو احنه كبلهم حررنا بلدنا من الدكتاتورية . وهاي النتيجة ، كلها جرت ورانا .
كًتله : احنه مانريد نوسع السالفة ونروح نكلب بالدفاتر ونكول مخطط امريكي لمنطقة الشرق الاوسط ، وهي كبالة اوباما جا شلون ، ايه . هناك اكو ناس تخطط واكو حكومات تنفذ شحسبالك .
ونجي لشغلة التحرير . همه اخوتنا الليبين احفاد المختار طلعوا وحاربوا وانتصروا وشلعوا الدكتاتورية ، بس احنه ماعملنا باصلنا بالرغم من متانة اصلنه ولايتنه لاهل البيت ، تره جنه خاتلين جوه اللحاف لو واكفين وره الباب ننتظر امريكا تنطينا الضوء الاخضر حتى نهب ونحوسم العراق او ماتبقى من العراق ، لان حصة الاسد راحت لامريكا الحاربت بمكانه للاطاحة بالدكتاتور، ها جا كلشي بثمنه ، راحت ديرة بلاش ، هاي بس عدنا ، بلد مفضل الله عليه بكل الخيرات بس ماكو زلم تكضه ، ياهوا اليجيك مهلس بس يكض الكرسي ، كول ولانه وليه . تكول شرايج ، لحد من دك صديم لانت الناس وتالي أجرنا جيوش عالمية تحارب بمكانه حتى تخلصنا منه . واحنه هيج سوينه بس هم المستثمرين يسمونه مرة تحرير العراق ومرة احتلال العراق ، بعد شغلتهم والامم المتحدة مال الخلفوهم وبكيفهم .
ومن طاح الصنم ،عيوني التمت ، كلمن شخط سيارته او طيارته او مطيته وجاك يركض وهدمه يسحل وراه وكالوا احنه ثوار 9نيسان . وكلمن كال انه اخوخيتي وحميتها . وشوفت عينك تسع سنوات والبوك والفساد وصل للهامة ماخلوا شىء ، كُولة صديم سووا العراق تراب ، اكلوه اكل فرهود ، شتريد بالقانون بالكوتره بالعنتكة بكل الطرق ، هذوله ثوار الاحتلال ، ويكولون احنه ثوار التحرير ، وخاف التشوفه عبالك اعمار ، لا ، تره هذا وجه من وجوه الفساد ، والا شلون يبوكون عيني ، هيج عينك عينك ، ومنين يجيبهن الكريشات غير يطلعوهن من القاصة ويبدا اللغف . وابشرك تره كلها متورطه ، وخاف كلك واحد بس انا شريف ، تره وداعتك كلها اتباع الشيطان ، واليأكل العنز يطلع الدباغ . ولاتاخذ كل حجي البرلمانيين والسياسيين جد ، تره يكضون وقت براسنا ، انا اكلك ايفيدك عملك اذا جان صالح ، تره هذني الكلاوات وانت تعرفهم مايفيدن ، وانا مو انصحك بس اكو احسن منهن / هو اتوحد الله وتخاف الله وتذكر الله في كل وقت / .
انا طولت عليك ، بس اشوف واسمع وافرزن زين ، وجنت اتمنى تضحياتنا جانت على التحرير ولا هل الارهاب الماكلنه شوي وكلي على ابو نحارب الاحتلال والتمت من بعثية الى قاعدة الى سلفية متطرفة وهابية ومجرمين محترفين كول صرنا منكب زفر شكلك العراق قلعة الارهاب وذبينه مليارات الدولارات على الحرب الى جانب امريكا . والقبض هل تشوف خراب وفساد ونفاق حتى على دينه ماسلمنه . كل يوم يطلعنه مسيلمه شكل وصرنا عايشين بالشبهة ، الله وكيلك مانفرزن الحرام من الحلال برزقنه , وصدك اليخليني احجي وياك هو الجمعني بيك حب الوطن ( العراق ) هذا المكرود بين الدول ، شفت صار بينه ويصير بعد اكثر كل من سببنا ، جا، ها ، خلصناها نصفك لصديم لمن تسودن وبعدين راح لدار حقه ، وهل اجتك العجاجة محملة شكال ،ورتنه ور ، ولازالت العجاجة لف بالدار ويوميه شامره طركاعة علينه وماتخلص تره وتهدا الا بخراب بيوتنه . جا ماتفض هيج ، بعد كلك عجاجة ماوراها غير الزبالة والسخام واطير حتى هدومنا وتخلينا عرايا عباد الله .
هي هسه زينه ماوصلت للهدوم ، بس توصل وداعت ابوك ، وذوله اليوزعون الارزاق مال الناس بكيفهم ، هذا للشعب وهذا النا . وصفت كله الهم ، وظل الشعب حواسم عايش ،وحتى ابو العلوة مال المخضر هم فسك علينا كبب سعر الطماطة لالف دينار وانت قيس الاسعار شلون اشتعلت نار .
والحجي هواي يهل تسال علينا .