بغداد مابيها خنگ بغداد بيها بس عشگ
وبيها السياسي يحترگ ويموت بس يحچي صدگ

بغداد مابيها قهر ولا بيها عاشور وصفر
بغداد بيها شكم نفر مسلوگ بالدنيه سلگ

بغداد ما بيها سلب ولا بيها بوگ ولا نهب
والعاش عمره بلا حزب توصلّه حصته للحلگ

بغداد بيها الكارثه كرسي الحكم منورّثه
مرّات تحصل حادثه وتثور چيلات وتطگ

بغداد بيها مشكله ريّسها وادم ما أله
تگعد گباله وتسأله مرتاح لو لازگ لزگ

بغداد مابيها فگر خيرات عَ الوادم تدُر
والناس ملتهيه سكُر لو ترگص بحفله وتدگ

بغداد تجري كلها مَي مْن سنين بيها الظلمه ضي
بغداد تضحك من دبي للحين مسحوگه سحگ

بغداد مابيها ظلم من فتره عطّلنه الحكم
وسوّينه قانون ونظم واليحچي جيره عله الفرگ

أبّغداد ريّس قشمره مسكين يكبر من وره
تفكيره بس الآخره وماله علاقه بأي لبگ