يُمّه (أمّصيفي)..! هكذا كنتَ تعشق هذه الكُنية عندما أُنادي عليك... بالأمس طرق بابنا (جعفر الخياط) ... إبن (قطّاعنا) الذي طالما كنت تقوم بخياطة ملابسك عنده.. قام بتسليمي أمس دشّداشتك (الزبدة)..! وقد طرّزتْ أكمامها أزاراً ذهبية كما طلبت.. يُمه دشّداشتك (تاكل وتشرب) وي طولك الحلو... أطمئن (ضمّيتهه) بكنّتورك يبعد أهلي وطوايفي... والحـﭼـي بيناتنه) يبعد آنه : خطيبتك (دُعاء) حيل ..حيل (غيّارة) من شافتّني أشمّشمْ بذّيالهه...
(أرّبيعتك) أول البارحة شفتّهُم فرحانين ومّكيّفين ... ثاري (البرّشة) فريقك المُفضّل فاز بالدوري.. وتذكّرت من ﮔلتلي عندما كُنا نطوف بشبّاك ضريح (باب الحوائج) : يُمّه .. إذا يجيني وَلَدْ أسمّيه (إينسيتا) وإذا بنيه أسمّيهه (كاتلونيا)!.. هاكِثر يروحي تحب الطوبة..؟
يُمّه (صافي) وياي أنت غير ؟ لو ملّتهي تفكّر شلون (إرّبيعتك) يغلبون (السيدة العجوز) بنهائي أندية أوربا ؟!... وياي ..؟.. خوش ﭼــا : أبوك قبل مالله ياخذ أمانته , أشّتراله قطعة بمقبرة النجف .. ﮔالي : يم صافي ..أهلنه ماظل شِبِرْ فارغ يمّهُم ..أشتريت هذا المكان على مودﭺ وعلى مودي .. حتّى مصطفى هوّه الّيتكفّل بالدفن..! آيه يُمه بــ (الفتحة الأولى)...
دير بالك على أرّويحتك ... ونام زين ولاتنسه الغِطه...وصير (هاب ريح) ويّه إخيوتك.. ونادر .. وريدك نار وشرار... تره الدواعش (غدّارة) وهمّه مو زلم (حوك)...
(دُعاء) خطيبتك سولفت وياي ذيـﭺ الجمعة وﮔالت : عمّه .. آنه ومصيفي نعرّس ببو الجوادين , ونـﮔـضي ليلة بكربلاء وليلتين بالنجف والكوفة.. وتـﮔول : عمّه .. ماريد زفّة .. الوادم بيا حال..
أشّتريتلك (ألّبومات) جديدة .. وصّيت صاحبك (عامر المعلم) جاباهن إلي من (المتنبي).. ولمّيت أصّورّك كِلّهن ... وحطّيت أول صورة : البيهه مدنّـﮓ على رِجّلي وتّبوس بيهه من أنّطوك شهادة أول إبتدائي ..!
من تجي (مُجاز) .. شلون أمّحضرتلك (بانيه بتّرة) و(تمّن عنبر)و من خوالك البالشامية... وزوج شبابيط (غابّه)... وأدري بيك تموت على (ﮔـليجة أُم الحلقوم) تاكلّهه من تشرب ﭼـايي المّهيّل.. يُمّه مدري ليش ﮔـلبي يلـﭼـمني من تسولفلي على (الفلوجة).. وتحصرني الضحكة دوم من تنشدك (دُعاء) بعدك بالفلوجة (المفّلوكة)؟ كنت تُجيبها وأنت ميت من الضحك : (الفلوجة مدينة الأرهاب والكباب)..!
أنت وعدتني بأجازتك الجاية ..(أتطلّعلي) جواز... حتى أروح أزور الرضا...
طلبت من خالاتك وعمّاتك وحبايبنه .. بس آنه (الهلّهِل) بعرّسك.. ولاتخاف أقاربنه من النسوان كِلّهِن (ﮔـصيتلّهن) قماش... (فيزون) اليلهث.. خايب يُمه.. شو (طـﮔّـني) النَعاس..! والمخدّة بعيدة فوﮒ (النضيدة).... بيه مجال (أتّوسّد) أدّشيديشتك الزبدة.. هم (أَشمّشم) بيهه.. وهم أصلّي إعّليه .. الفجر.. وأدعي ترّجعلي ...سالم...