على كولة اهلنه لكل مجتهد نصيب بس الفرق بين المجتهد بالعراق شكل والمجتهد بغير العراق غير شكل لان البخت ما يجي الا ويه المبخوت بس العراقي المسكين ما يفيده حتى لو سدوله دبل بخت حتى العبقري الي بالعراق ماله حظ ولا مكان و هججوه كوة مروة وماخللوله براسه ذرة عقل يفكر بيه مثل اقرانه من العلماء بغير ديرة ، اي ليش مو هاي الناس ثروة للبلد والعالم اتدورهم ادوارة وصرنه نستهزئ ونقلل من قيمتهم مع كل الاسف ومن انشوف واحد ذكي لو مفكر نصير ننعته بصفات ما انزل الله بها من سلطان والمخترع انكوله (مخترع) ونكرهه بنفسة وبالعلم الي شايله بدماغه ونطلعه من طورة وننعل سلفه سلفاه وياما خصرنه عالم بهاي المواصفات ونحرمه من فرصته بالحياة ونقتل مواهبه بس السالفة وما بيهة انو الجماعة والربع هنا المطبقين المثل الي ايكول (البزون اتحب خناكهة)وكأنما الناس صاروا يحبون الغلط ويكرهون الصح ويمشون ورا الي يئمر بالمنكر وينهة عن المعروف !!! ويركضون ورا صكارهم حتى لو يكوللهم انه الشمس تشرق من الغرب وتغرب من الشرق مراح ايعارضوه ويقدمولة فروض الولاء والطاعة وهمة الممنونين ، اي لييييش والى متى تبقى الناس نايمة على أذنهه والى متى تبقى اللعنة به لبلد اتطارد الناس من جيل الى جيل صرنه من سيء الى أسوء ويا عيني عليك يالعراق بس تتحمل اذية ولا واحد حاس بيك وبوجعك وكلما تحجي ويا (المسؤول!!!) ايكلك احنه خدام للعراق اي ولك ياخدام مو انتو صرتوا للبلد هدام واغلاطكم صارت مثل الاهرام والظلم وياكم دام بس لا تنسون ترة عين الله متنام وحياكم وتاريخكم كهلة اوهام باوهام ........ والى هنا بات الكلام يا سادة يا كرام.
خلف ابن امين