اريدنك كفاءة بحب هلي الطيبين –مرشح للنيابة وصادق النيه
واريدنك كفاءة تقدس الانسان – واريد الدين عندك حالة سلمية
وماريدك عبد للكتبو التاريخ –اريدك حر- وبيدك تصنع التاريخ يوميه
واريدك تكتب اسمك واللقب ينشال – وتبدل العشيرة بصيغة حضريه
واريدك للعدالة تبايع باخلاص— دوله بلا عدل دولة عبوديه
واريد صوت يصدح بالمباديء حيل – انت بلا مباديء عالة شعبيه
واريدك تلغي ببلادي الفقر والضيم – وما نسمع برامج مَحوْ اميه
واريدك تلغي من بالك نسب وامجاد – من ادم وحوه الناس ذريه
واريدك تعرف النائب وقف للناس – هوَّ النِذَر نفسه بغير جبرية
والخدمة العظيمة بمجلس النواب – حضارة ودين مو صفقات ماليه
واطلب مِنَّك اتعيد النظر مرات – وتشوف المذاهب فكرة شخصية
ورثها الناس محد مذنب وينلام – واديان الارض آلاف فكريه والهيه
واريدنك شجاع تقاوم النعرات – و بروح التسامح مو بثوريه
واريدك بالدعاية تكول اموت اهنا – وما عندي عداكم غير جنسية
جليل عبد غاطي-2014