يذكر ان بلدية الناصرية تأست سنة 1921 وبنظام رئاسي وقد تغيرت الى ان تصبح على النظام الاداري في عام 1969 لتصبح من ضمن الدوائر التابعة للحكومة ومن ذالك الحين ادار البلدية الكثير من المدراء والذين بذلوا قصارى الجهود التي يشكرون عليها لتقديم افضل الخدمات والتسهيلات الى المواطن لانها انشاءت من اجل المواطن ومن خلال اطلاعي في الانترنت حاولت ان اتقصى واعر ف ماهي واجبات البلدية وما المطلوب من البلدية اتجاه المواطن ماذا تقدم للمواطن وهل البلدية هي في خدمة المواطن ام هناك امور اخرى انشاءت لها على كل حال وجدت ان واجبات البلدية هي الاتي .
1- منح رخص البناء والترميم وملاحق المباني ورخص الهدم . على ان تشكل لجان ثابتة وتتابع باستمرارية كل المتغيرات ولا تقبل بالتساهل مع اي شخص
2- إصدار القرارات المساحية وقرارات زوائد التنظيم
3- منح الرخص المهنية ورخص المحلات التجارية والصناعية وما يدخل ضمن هذا المجال
4- مراقبة الأسواق التجارية واتخاذ الإجراءات النظامية مع المخالفين : والإحالة للشرطة اذا استوجبت الحالة –وتوقيع الغرامات للمخالفين
5- المتابعة الدؤوبة و العناية بالحاويات والبراميل النفايات وتقديم افضل الخدمات للمواطن من خلال رفع النايات وتوزيع اكياس النفايات وتوزيع الحاويات للمواطنين
6- العمل مع اللجان المختصة بالمحافظة في أعمال تبليط الشوارع ( السفلتة ) والإنارة والتشجير وإقامة المجسمات الجمالية والمخيمات ، والاحتفال بالمناسبات العامة .
7- القيام ببعض المبادرات بالاشتراك مع الجهود الشعبية ، مثل تمهيد الطرق وإقامة الاستراحات وملاعب الشباب وساحات الأسواق ، ورش المبيدات .
8- تحصيل إيرادات البلدية بنوعيها : الرسوم العامة ، والغرامات . على ان لا تكون تثقل كاهل المواطن على سبيل المثال لا الحصر ( كراج المحافظة – وعلوة الخضار ) الاثنان اثقلا كاهل المواطن وحتى المؤجرين لانهم يعيشو في رعب خوفا ان لايستوفي المبالغ المدفوعة ) اتصور ان البلدية هي في خدمة المواطن لاخدمة نفسها
9- القيام بالشؤون الإدارية للبلدية الفرعية : متابعة بناء الهيكل الوظيفي وأدائه وإنجازاته ، وتنسيق الأعمال الإدارية اليومية ، وتشغيل وصيانة أنواع المعدات الميكانيكية بالبلدية .
هذه بعض النقاط التي استطعت ان اعرفها من القوانين السائدة وبعض الاعراف من خلال ما تقدم تبادرة لي بعض الاسئلة فأخذت اسئل نفسي هل لنا ان نغير من واقع البلدية لانها من اهم الدوائر تماسا بالمواطن كون الدائرة الثانية هي الكهرباء والمواطن استطاع بجهودة الخاصة الاستغناء ولو لبعض الوقت عن هذه الجوهرة . رحم الله اديسون !!! .احبتي الافاضل من ضمن الاسئلة هي ماذا طبيق بلدية الناصرية واخص بلدية الناصرية بالذكر لانها اكبر بلدية في المحافظة . من هذه النقاط العشرة التي اسلفت وما هو دور الحكومة المركزية في هذا الاداء وما هو دور الحكومة المحلية في ادائها بصراحة انا تحيرت وحاولت ان اجد بعض المبررات لدائرة البلدية لغرض ان اكون منصف معها لكني لم اجد حسنة اضعها في ميزان حسناتها اخذت على عاتقي ان اسئل كل شرائح المجتمع عسى ان يدلني احد على شي لاذكره اخذت حالي وذهبت الى كراج سيارات الرفات في شارع النبي ابراهيم (ع) سئلت بعض الاخوة وليتني لم اسئل الكل متذمر بالقول ان البلدية عجزت عن تعديل ساحة ترابية او اكسائها بمادة السبيس لاننا في الشتاء نعاني مانعني مع الركاب لحين ركوب المواطن بالسيارة وتطرقوا الى مشاكل بالاحياء فطلبت منهم عدم الخوض في هذا الحديث واردت ان اتكلم فقط على واقهم تطرقوا الى عدم استقرار الكراج وكونه مهدد بتغير مكانه . انهيت كلامي معهم واكتفيت بما قالو وركبت مع احد سواق الرفات بأتجاه السريع الى اصحاب العلاوي أي اماكن بيع المواد الانشائية وابتديت الحديث معهم لكن للطريفة جائني احد العمال وقال لي اخي الفاضل هناك مثل شعبي يقول ( خبزة لاتثلمين وباكة لاتفلين واكلي لمن اتشبعين ) بصراحة اني اعرف تفسير هذا المثل فبادرته بالقول تعال رحمة الاهلك فسرلي هذا المثل شنو تقصد فرد علية وقال يعني لا يوفرونة مكان خاص ايكون لكل اصحاب العلاوي وبيع المواد الانشائية لغرض توجه المواطن حصرا لهذا المكان . ولا يتركوننا نعمل في هذه الاماكن ( كل يوم هزي تمر ينخلة يومية جاينة كومو من هذا المكان ولا مسوينة اجايز حتى نكدر انحاجج بيها عمي والله ملينة احنة على باب الله ادري وين انروح يرضون نوكف بالشوارع ونسلب موعدنة عوائل واحنة شباب والله كمنا نستحي من اطفالنة مو عيب هذا الحجي . بصراحة بعد ما كدرت احجي واكمل كلامي لان كما يقال الجواب مبين من عنوانه (( والجواب عند القراء )) فكلت يابا خلي اعوف هذا وجع الكلب واروح للسوك بلكي الناس اهناك تشتغل ومستفادة وان شاء الله راح ايذكرون الاخوان بخير وهمة اهل لذالك دخلت للسوك ومن سوق هرج ابتديت لكيتلي حجية طاعنة بالسن يمكن عمرها 70 او75 بصراحة نسيت اسئلها عن عمرها معلينة بعمرها مخلية فد كوم من الجزر . بس هي ساكتة ما تنادي مثل الباقين فجلست يم العجوز وبديت اخذ وانطي وياها بالكلام وكلتلها حجية اشو ساكتة لاتصيحين ولا شي كالت حبوبة اني صارلي يومين الله يكفيك الشر بلاعيمي طاكة أي ( التهاب الوزتين ) وما اكدر اصيح كتلها حجية شنو رايج بالبلدية كالتلي لاكن بعصبية يمه الله لا !!!! . فرديت عليها ليش شنو مسوين كالت يمة جانت عندي بسطية بداية سوك هرج لكن اجت البلدية وكومتنا واخذت المكان ومدري راح ايسونة جامع مدري سوك يمة كطعوا رزقي الله يكطع !!!!! كتلها حجية لا ادعين انتي مرة جبيرة واخاف صدك يقبل الله دعائج وهمة هم ولدنة واخوانة حاولت انهي كلامي ويا الحجية لان والله اثرت بية حيل لانها معينة لاربع بنات وحدة من بناتها ارملة وعدها طفلين وساكنين بأيجار وبيت مما يطلق عليهم حواسم ولو اني استنكر هذه التسمية لانهم اصاحاب الارض لا تطلق عليهم هكذا تسمية على البلدية وهي معنية بذلك توفير الاراضي ولو بمساحة 100 م او حتى 75 م واعطائها للمواطن .. لنا حديث بهذا الموضوع . ذهبت باتجاه شارع عشرين ودخلت سوك سيد سعد الكبير وهنا تسكب العبرات وجدت شاب بعمر 30 عام وهو بائع مواد بسيطة ( خمرة ام الربع – مشط – لاستيكة – خواشيك – فرش اسنان – صبغ احذية _ الى اخره ) بسطية ازغيرة بس حالة كلش تعبان ولفت نظري بديت اشتري منة بعض الحاجيات وفتحت ويا الكلام بخصوص رئية بالبلدية فكال خوية انت وين اداوم كلته ليش تسئل هذا السؤال كال اشوفك مبدل قاط والحمد لله ومحفظتك بيدك ومهندس روحك. كتله احمد الله واشكرة وان شاء الله ينطيك الي تتمنا انت ما عليك بية وين اداوم كلتة هسة صيحلي على جاي وماي بارد فشربت الجاي وبيدت احجي واسئلة سولفلي شنو قصتك كال خوية اني خريج معهد ومتزوج وعندي 3 اطفال وكاعد مع اهلي الي يزيد عددنة 27 نفر ومساحة البيت 150 م وانت قيس ( طلعت حاسبة وقسمت المساحة على عدد الافراد اصبح لكل نفر 5.5 متر تقريبا الله يستر على الجميع ان شاء الله ) حاولت اتعين وقدمت معاملات اهواي ما حصلت نتيجة طالبنة ان اتكون ساحة للباعة المتجولين يعني البلدية اتسويلنا فد مكان ايكون فقط للباعة المتجولين وبنو قبل فترة خلف مدرسة النسور ورحنة اهناك بس ما ربحنة شي لو ايسولنا شارع ويحددونا يوم بالاسبوع او يومين حتى نترزق الله والله يا اخي تعبنة . زين اريد اسئلك اني مو مواطن عراقي ومن حقي امتلك ارض اني لو عندي ارض حتى لو كانت مساحتها 50 م اكدر ارتب حالي وابيع الغرفة وادين واعيش اني مع اطفالي اخي اريد اسئلك ليش البلدية ما تنطي اراضي للمواطن يعني بس الموظفين والا 5 سنوات ادري وين انروح ما اطول حديثي وياكم اتقدمت مسافة اشوي وصلت لشارع الحبوبي واذا رجال كاعد على كرسي وصيح باطنية باطنية بصراحة استغربت واجيت يمة عمي شنو باطنية كال بوية اني فراش عند دكتور فلان وهو اختصاص باطنية فحجيت ويا عمو شنو رايك بالبلدية فرد علية بضحكة عالية جدا استغربت من الرد كال بوية هي وينها البلدية بس اسم والله الحمد يومية جاينة وخروا القطعة مال الدكتور فلتوها وتلكة عمك ثاني يوم ادور على حداد ويلمها يوم يجون هذه القطعة ضوئية لو موضوئية انطينة 3000 هاي مال جمالية المدينة يعمي روح رحمة الامك وخليني بضيمي ورد ايصيح باطنية صدرية فقررت ان انهي الجولة بالسوك لان اخاف ايصحلي واحد محترك كلبة ويعاركني من صدك . في صباح السيارة الحدادية موزينة فقررت اروح الى الحي الصناعي وكلت بيها وبلياها اشوف شنو الوضع المهم رحت وشكلكم الله ايساعدة العندة سيارة عاطلة لان اتكول ما ادري شنو محد يشتغل الكل ضايج ومدلغم يابا اشبيكم هاي شنو اليوم اشو الكل ضايج صاير شي كالو لا عمي اليوم البلدية جابت الاليات وكرفة شكو سكراب وهذا السكراب بي حاجيات زينة ونحتاجها من الصبح كرفتها وذبتها بعيد وبالاضافة الى الايجارات الي صعدت وغيرها وغيرها المهم ما اطول عليكم كملت السيارة وذبيتلي 150 الف دينار رجعت يم ابو الدهن وهم سئلتة بصوت ضعيف عمي انت شنو رايك بالبلدية ماجاوبني رديت عليه السؤال كال عمي احجي بصوت عالي لان ما اسمع عندي ضعف بالسمع مالتي والله كسر خاطري لان رجال اكبير بالسن وحالة يصعب على الكافر . بدلت الدهن وجيكت البور والبريك والكير . كلت خلي اغسل السيارة فد مرة هي صبحية راحت علية رحت يم ولد شباب بعدهم بعمر الزهور بس والله عجبوني نشاما واسباع لان الي يعمل من اجل جمع المال بالحلال هذا سبع وابن ناس ومؤدب سئلتة بوية انت اشكد اتحصل يومية كال والله عمي مو سوة يوم احصل 30 الف يوم 5 الالف يوم 15 مو ثابت على رزق الله وضحكني بالقول عمي احنة انكيف اذا تمطر الدنية حتى تجي الناس تغسل السيارات بس لو ما مضايقات البلدية ونتمنى ان البلدية اتوفرنا اماكن خاصة لغسل السيارات حتى اذا مقابل اجور احنة نكدر ننطي يومية حتى 10 الالف دينار بس كون ايفرونة اماكن زينة ومحد ايضايقنة يومية ما اطول عليكم رجعت للبيت واني محبط صراحة من اداء الاخوة في بلدية الناصرية لاننا نريد منهم الكثير . بدوري انهيت الجولة وقلت في نفسي عدم التجوال اكثر من اللازم لان الجواب بان ... وللحديث تتمة ان شاء الله نشرح كل نقطة التي هي من واجب البلدية وايضا نتطرق الى واجبات المواطن لاننا لا نبراء ساحة المواطن من التقصير لكن البلدية هي المعنية بنشر ثقافة عدم التخريب أي رمي النفايات – التجاوز على الرصيف – تخريب الطرق – وغير ذلك هي معنية بعمل دورات او فرض غرامات فورية على المخالف ليتجنب المخالفة والله الموفق وهو ارحم الراحمين