إجاني العيد/ابو عقيل الناصري
Sat, 3 Aug 2013 الساعة : 16:28
إجاني العيد ... إجاني العيد
نسى أصوابك يبو الحسنين .. ياحيدر وأجاني العيد
وأنه بجرح الوطن مجروح ... والجرح الجبير أمجيد
وآلام الكصت بالروح .... تسعر ماتريد أتهيد
كضّاها الوكت وياي .. تصعيد بأثر تصعيد
خبيث وجنّد الويلات ...ضدي بلا وعد تجنيد
وكلبي أعله العذاب يصيح زيد بنار هجرك زيد
وبعد دم العراقي يسيل من شعب العراق الصِيد
ومن عشاك أبو الحسنين بالتحديد
ورفاكتنه أكتفت ياويل .. ويل الويل ... بالتنديد
يكلبي الصدكت بالناس كتلك لاتروح أبعيد
وحذرتك وكتلك عوف .. كل قوف بهواك وصوف
بعد هاي البشر متفيد ..
يالمالك شغل بالصَّيد .. وين تريد عود تصيد
وجّيني أعله راَك العيد
حتى أشتم عطر بلواك .. وأذب شبجي أعله نار أجفاك
بلجن عن هواها أتحيد
وتطلع من حزنها الروح .. لو تسكن فجاج البيد
وطبعا ياحبيب الروح .. من صيد الفرح متصيد
خليني أختزل بلواي .. وأتجرد وأصيرن ناي
وأكتب لحن عمري أبعيد
وأنه بثوب الحزن مدفون .. واليسوه أعله نار أجفاي
والمايسوه تكرم كام .. يغرد بالضحك تغريد
ياحيدر يبو الحسنين ..
ماصدّك يصادف يوم .. يستعدل أوياي البين ..
ويحط قدري الوكت بالعين ..... ويتحفني بمثل ماريد
وأفرح مثل باقي الناس .. لو كالوا أجاني العيد
..............................
مبروك عيدكم مقدماً....وتقبل الله اعمالكم
الشاعر : أبو عقيل الناصري 2013
