ياحيـدر يبو الغيــرة الوطن طــاح وأنتـــه الأمل ياراعي الكلافــــة
ومحــد يالغيـــــــور يعاين عليـــه كلهـــــــا تعاين لكرسي الخلافـة
يعنوان الوفه وهذا الشـــعب ضاع وأنته تشوف ألف وسفه وحسـافة
والوادم أنكلبت ـ حاشـــا الأجـواد ـ أعلدين المصطفى بسرعة وتكافة
وطغـت وتكبـرت وتمـادت النـــاس والله بكبــــره ماكــــامت تخافـــة
وكامــت تعتبر أحكام الأســـــــلام وقيمنه الحلوه من صنع الخرافـة
والمســـؤول أصبح غير مســؤول ويخدعك من يصرح بالصحافــة
يظاهر بس مظاهر صار الأنسان ومشه بهذا المسـار أعله أحترافة
وللآخر دايخ بشـــــــــغلة الهنـدام ومهتــم حيــل مهتــم بالقيافـــــــة
يعجبـك مظهــره اللامــع الخـلاّب لجن ماعنــده بالداخــل نظافــــة
وأصبح للأسف ، للأسـف هاليـوم الضمير يمثل الهــــور بجفافــــة
الخمط والبوك وصّخ كل الأخوان وغدولك عَلَم بفنــــون النتــافـــة
خربهـــا الدحـس والضم بالجيوب وشــال من اليحبــــون الرهافــة
والبيـــــه ضمد جــان ونلتجــأ ليه أنشالت جلمة الزينه من أشـــافة
ربعـــنه اتغــــــيروا ما أفتهم ليـش وتجافوا فرد نوبا عله الشــــرافة
وصاروا من نراجعـــــهم يديرون عنه اوجوهم كلها بســـــــــــخافة
بعـــــد ماجـانوا الطيبـــين طيبـين حلـــوه اطباعهــم تكـطـر ظـرافة
وحك اهل الجهاد الربع غمـــطوه وهالمـــــره جحـا انبـاك بلحــافة
ألف ياحيف إي والله عله الأحباب ماشـــــــفنه بمواقـفهـــــــم لطـافة
واخص الكال منهـــم كلكــم اعزاز وأوكف منكم بنفس المســــــــافة
وانصفكم والمكـم وافتــــح الـروح واحطكـــم كلـكـــم بـدار الظيـافة
طلع غدار مايعـــــرف للأنصـاف امعلمه ابليـــــــس ومغلـفه بغلافة
أبعـــــــــد عـنه صحبانه القريبـين ودنّـه الجـانبـــــه المعـلـن خـلافة
انتخب مَن؟ انتخب منهم حرامـات وشــــبجـهم ركـد محـتاج الريافة
أولاد الوطـن للأســـــــف بالضيج بطمعــهــم فرقــــوا حتى إئـتـلافة
الوطن متمـــــــدد بصـالة الإنعاش ويكلـــــــوله جذب كلهـــم مُعــافة
يريدونه يمــــــوت وهُـمه يحيــون وعلى امواله يســــــــوّون إلتفافة
ومايدرون من يهلك يهلـكـــــــــون وأصل إحيــــاء بيت الله بطــوافة