أزامط ياوطن بآسمك

واﮜولن ..إنته هُـوَّ آني

عجيبه آني

إشما تقسى أﮜـولن دنيتي إنتـه

واﮜولن عمري كِلهَّ إنتـــــــه

عمري الراح والجاني

حملت إهموم يا مَهموم

مالحظة إكشفت حزني

إو عذابي آني

ألآوِيِ القهر

واتوﭽــه إعلى صبري

إمزامـط إويه الضيم

ولا بثِّيت حزني يا وطن آني

لأن غيرك ابد ماشوف يشبهني شخص ثاني

إوﭽـم مرة يدگ حزنك

ياوطن بابي

واجتني الآه تتوسل

تبوس الخد

ﮜالـت خلي نصّاحـب

آنـه اوياﭺ

واغرﮜﭻ بالدمع نهرين

اوكل دمع العراق

يفيض عد بابـﭻ

كتلت الآه

ولاﮜدرت تجي ابابي

وبسنين العجاف

اجت مرتين تتمرجح على بابي

تمِرمرني وأمَرْمرها

تلآويني وألآويها

إوماطخيَّت رآس إلها

عزيزه النفس

تتنفَّس صعوبه

لكنها تقاوم حيل وإتكابر

وﭺ هذا الوطن حافي

عليمن هالتكابر بيـﭻ

المهم ماﮜول هذا الحد

ولا فد يوم أكولن اعتزل كافي

المهم يبقى الوطن دايم

تظل دايم

المهم إنتـه

تظلِ انتـه

لأنك أغلى كل الناس

وأغلى من غلاتك ماشفت غالي

ما طِخْ للزمن

ياوطن رآسي

بس الغربه .... آخ الغربة

لون تدري

الوطن حافي

ولابيهم نجيب إيجيب

إنعال للحافي

يجاوبها الـﮜلب

حافي الوطن

وانعاله فوگ الراس

يانوماس خلَك فوگ

فوگ الراس

حتى إنشيل عنَّك ضيم

وإنشارك جَرح ماطاب

خل إتشوف كِل الناس

هذا أنتــه

إوهذولـه أحنــه

إودارك مايطبها أغراب

هذا أنته

إو هذوله أحنه

إو دارك مايطبها أغراب