منظومة الامثال الجديدة

( عيش يا كديش لمن يجيك الحشيش )

ومضة امل

 

 

 

يا جماعة اليوم جايبلكم خبر تازة !!

خبر يبشر بخير !!

 

ويبعث الامل !!

 

 

مقدما قبل ان نغوص في غياهب هذا الخبر علينا اجراء بعض الاحماءات حتى نتلقى الخبر بروح رياضية , ولو ادري بنهاية الخبر راح احصلي كلّة على افادي مثل كلة زيدان الشهيرة لان الكلاّت لا تتنافى مع الروح الرياضية !

 

 

فقبل ان تقرأ الخبر الذي طالعتنا به صحيفة الصباح بالعدد 2673 جذبة الصادر بتاريخ 4\11 لعام 2012 طيحان حظ !! اقتضى التنويه :

 

 

 

بان على كل مواطن لا يملك دار ان يتوجه فورا الى اقرب مكتب عقار ويسأل عن الاسعار .. والفلوس جاية بالطريق !!!

كل مواطن عاطل خل يروح لأقرب مصلح ( العفو ) مكتب استنساخ ويستنسخ المقدسات الاربعة وطبعا لا ينسى ان يضعهن بفايل شفاف ويحتفظ بيه .... لحين وصول موظف دائرة التعيينات لبيته !!!

كل شاب ما متزوج خل يروح لأقرب صيدلية و ياخذلة شريط فياجرة .... وينتظر وصول الزفة براس الدربونة !!!

وكل شابة ما متزوجة خل تستمتع بعلج ابو النيوة .... لحد ما يكمل البيطار دكَ حدوة حصان فارس احلامها ,, رجاء اخاف وحدة من البنات مستعجلة وتكَول ميخالف جيبوه حتى لو الحصان ما محذة !!

يعني يقبلهة ضميرها تنوكل حوافر الحصان بالطريق والشوارع المعبدة بالانترلوك و الاسفلت الوطني

لعد وين حقوق الحيوان !!

طبعا و الما عنده لام توم وسامع بالديس بوك بالاحلام فقط ... خل يثنيلة وسادة معدلة وجايينة بالام نوم , اخاف واحد يكَول شني هالغش اني طلبت لام توم تنطوني لام نوم , نكَول له عزيزي المواطن هاي ماركة جديدة انت بعدك ما سامع بيهة ونريد نختصر اخاف كم يوم وتكَول حدثوه الي , هوة حلم بلاش شخسران انت !!

 

 

هسة راح تجيني رفسة من مراقب الخط لان صار ربع ساعة رافع راية هرملة ويكَول يابة انت كَلت احماء قبل الخبر شو طلعت بالحجي كَووول فلازم نتقبل الرفسة بروح رياضية ايضا

 

 

و من رخصة الحكم الرابع عدنة تبديل لان احد القراء اصيب بنوبة فرح شديد مما سبب له ارتفاع بالظغط الى 180 الحجي بيناتنة يمكن سواهة صدكَ واخلة حباية فياجرة ( وتصير خطيته بركَبتي ) المهم دخل اللاعب الاحتياط ويكَول :

 

ما يقارب العام والعراق يعيش ما يسمى الازمة السياسية التي بلغت ذروتها في اوقات سابقة حيث كان الحديث عن سحب الثقة بعد ان استعصى عقد اجتماع اللقاء الوطني الذي علقت عليه جميع الامال بان يفك طلاسم هذه الازمة التي عصفت بالجهود الحكومية والبرلمانية وعلقت على شماعتها جميع الاخفاقات سواء على مستوى الاداء الحكومي او التشريعي او السياسي او حتى القضائي في تحقيق العدالة والاقتصاص من المجرمين الارهابيين

 

صار الحل سحب الثقة وبعد ان استعصت عملية سحب الثقة صار الاستعصاء الاول معصوف على استعصاء ثاني وثالث ورابع ...

حتى انقطع الامل وزعزعت الثقة بالنظام السياسي برمته , وصار الحديث بان هذا النظام البرلماني الفدرالي التوافقي هو مصدر المشكلة وسبب المآسي ولابد من تغييره الى نظام اخر وطبعا هذا يضيف استعصاء خامس لان ذلك يحتاج تعديل دستوري ..

واذا ما اكو اثنين متفقين على رأي لا اعرف كيف سيتم تعديل الدستور !!

 

هسة قد يقول القائل كاظم شنو فلمك ساعة تسويهة صيف وساعة هيف !!

 

اصبر قليلا عزيزي المواطن وترحم على الشافعي اذ يقول

 

 

ضاقت فلما استحكمت حلقاتها .... فرجت وكنت اظنها لا تفرج

 

 

جايك بالخبر ركز وياي كما اوردته الصباح في عددها اعلاه

((كشفت مصادر نيابية ان اجتماع الرئاسات الثلاث المرتقب من المقرر ان يحدد موعدا لعقد اللقاء الوطني مرجحة ان تشهد الفترة المقبلة اجراء حوارات مكثفة بين رؤساء الكتل والاطراف السياسية لمراجعة المواقف ونتائج الحراك السياسي ومباحثات لجنة ))

 

 

 

شفت شلون اجتماع الرئاسات المرتقب وركز وياي على المرتقب من المقرر ان يحدد موعد اللقاء الوطني , وهاي رجعنة للمربع الاول - طبعا بلغتهم مال مربع اول - و ركز زين على المرجحة وخو بعد الحوارات هاي ام التفآءل

 

رجاء نسوانة لحد تهلهل لحد ما نكمل

 

 

وعيش يا كديش لمن يجيّك الحشيش

حتى يتلاءم وي وضعنة ( وطحنة بناس ما تعرف وضعنة ) ومثل ما تعودنه عليه من تحوير الامثال الى صياغات جديدة بحيث تصبح تضرب وتقاس راح نسويه

 

عيش يا شعب لمن يجيّك المرتّقب

 

 

عاجل : صدر الان بيان من الرئاسات الثلاث يطالب المواطنين بعدم اطلاق العيارات النارية في الهواء !!