سالوفة غدر/نضال الحار
Sat, 3 Nov 2012 الساعة : 15:20
بيّ لشوفتك دهرين
دهر راح وتلاشه ويه الفجر شهكه
وبي واهس دهر ينطر شوفتك
سنين العمر وياك بس فركه
جنت أضنك تهمس أبالي وفه
وجنت أضنك لأيام بارح
والشته الكارص دفه
وجنت أضن الشوك مايخلص بروحك
نهر جاري لكاع صبخه عطشانه ولفه
وك وخاب ضني
وماحسبت حساب ينساني
كلبك هَيج وبسرعه جفه
وجنت أَضن الشوك البيك نجمه
عمر الضوه البيه مالحظه طفه
وعَفه وهذا زودي الزامط بيه
بيك يصيح بكل حركه عَفه
وهذا حالي الصار سالوفه
بحلك كل شامت صفه
وهذا أنا عليل غدرك
وماأضنن أصحه منه
لا... ولايمرني الشفه
وبي لشوفتك بحر دموع
دمع طاح ودمع باقي بسواد العين يتلضه
وبي من غدرك جروح
جرح خزِّن
وجرح باقي بجروحه البيه يتشضه
وبي لمناطرك عمرين
عمر ضاع
وعمر باقي بوشالة روح يتكضه
