رافقت احد الصفيين اثناء اعداده لتقرير حول المتنزهات ومدن الملاهي خلال اول يوم العيد

 

وبعد ان قضينا ساعات ممتعة سويتا حيث الماء والخضراء والوجه الحسن - اوقات لم تمر عينا إلا بالعام مرة - او لَربما ما مرت على الكثيرين ممن ادمن الغناء لها زورني كل سنة مرة !! افترقنا وكل اعدد تقريره بما تشتهي مؤسسته الصحفية , ولاني لا انتمي لمؤسسة صحفية وهذا من نعم الباري عليّ اذ لست ملزم بلغة معينة ولا تنقيح لغوي ولا مقص رقيب ولا مقيد بسياسة معينة .(او الحجي بيناتنة عندي مؤسسة خرنكَية على كَدي متكونة من ام العيال و4 افروخ كلفتني بأعداد تقرير عن العيد حيث تعذر عليهم الخروج من البيت بسبب اضطهادي لهم ) وكَلت الهم يابة شني العيد اني راح اطلع واجيبلكم اخبار العيد صورة وصوت !!

 

وكالعادة بلغة الشارع اورد لكم تقريري الخاص عن جولتي في المتنزهات ومدن الملاهي التي اكيد مو شرط كل العوايل تطلعلها لانها توصلهم للبيت مع الحصة , و سأعرض لكم بعض اللقاءات اللي اجريتها مع بعض العوايل 6 سلندر اللي الله وفقها للاستمتاع ببعض ساعات العيد وبعض المشاهدات البسيطة

 

التقرير بصورة مقتضبة

 

المشهد الاول

 

انتو عمركم شفتو واحد يعيد بشورت ودريس !!

 

اني شفت احد المواطنين معيد قرب احد المتنزهات بتشيرت ودريس , طبعا مثلكم المشهد اثار اعجابي و تَعَجُبي معا , وقررت ان اظهره في التقرير , لا تكَلي ولا اكَلك طفحة ورة ابو الدريس الى ان صرت بصفة وسالته : يابة ليش انت لابس هيج وميز نفسك عن الكل ؟؟

 

طبعا طلع الاخ احد عدائيّ قفز الحواجز , وفرصته الوحيدة للتمرين هي العيد حيث تكثر الحواجز و العوارض بكل الشوارع خصوصا قرب المتنزهات , شفتو شلون العراقيين يستثمرون كل الفرص و الاوقات حتى العطل و الاعياد الوطنية والجغرافية بالعمل والسعي من اجل تحقيق النجاحات !!! فهاي مدالية ذهبية اجتك ياعراق بالولمبياد الجاية وخل نسجلهة بموسوعة غينيس مقدما للحواجز والعوارض الكونكريتيه !!

 

بعد ان عرفت هاي الحقيقة لابد لي ان اسأل بطل العراق بقفز الحواجز شنو شعوره بهاي المناسبة و رأيه بالإجراءات الامنية .

 

فبدأ جوابه البطل بالسلام على اهله و امه و اخوانه و اخواته واحد واحد حتى خذة الواهس وراح يعدد جميع افراد العشيرة غير اني ( ندسته بخاصرته ) و كتلة احنة على الهواء مباشر اختصر بسرعة , فعرج بالشكر على القوات الامنية و ابدا اعجابه بالخطط الامنية لاسيما كثرة الحواجز !!!!

 

مشهد ثاني

 

احدى العوائل طبعا هاي 4 سلندر ويمكن جايين من العشاير لان الحجي شفته ( يهف ) أي يمشي مسرعا , وعلى بعد مترين ونص وراه ( جوكَة ) مال نسوان متكونه من مرة حامل وسانداتهة نسوان اثنين ( يتجّلهة ) أي يمشنهة وبعباية كل مرة مجلب فرخين , هسة واحد ذكي يكَول شلون عرفت الجوكَة تابعة للحجي وهي تبعد مترين ونص خلفه ؟؟!! سؤال وجيه بس مو عباس ! الجواب من الغندرة الجوبلس نفس الماركة , يعني عايلة وحدة ! وطبعا هاي محد يكَدر يعرفهة إلا اذا كانت عنده خبرة بالغنادر !!

 

الله شكَد مشهد رومانسي - اخاف نون قبل كم يوم يكَول ليش العراقيين ما يستخدمون الورد - فهذا هو الرد القاطع بالدليل العلمي والعقلي والنقلي والمنطقي ( على كَولة الصرخية ) يعني شوفوا شكَد العايلة العراقية رومانسية !! شويب من الريف ما يقبل ان يمر العيد دون ان يخرج عائلته ( بكافة افرادهم ) للتفسح و التنزه !! حتى الحامل ! لا اخفي عليكم هم اثار اعجابي , وتعجبي من ناحية اخرى , يعني هاي المرة خطية المن جايبيهة واحتمال باي ساعة يصير عدهة ولادة ميمونة !! وبعدين كلت يجوز الحجية ناذرة نذر اذا مرة ابنهة حبلت تجيبهة بمتنزه !! الله الله شكَد رومانسية .

 

لا تكَلي ولا اكَلك هم طفحة طربكَ طربكَ وراهم الى ان لكَفتهم طبعا امتنع الحجي عن الادلاء باي تصريح وقال اني اتحفظ على اللقاء الى ان يوصلنة السرة مال السونار !!

 

طبعا طلع الحجي جايب مرة ابنة للسونار , ايباخ شكَد تطور بالعراق , يعني بكل راس شارع مخلين سونار ( مجاني ) خو مدن الملاهي والالعاب كل 3 امتار توجد كابينة مال خدمات سونار ( ومجاننا اكيد ) , فاني ما حَبيت ان ازعج العائلة الكريمة خصوصا هية 4 سلندر فأحتمال باي لحظة الحجي يكَحص علية ويكَطع كرنك , فأنتظرت الى ان طلعت النتيجة مال السونار وطبعا اني همات خذولي سونار كَالوا اخاف جلاويك بيهن شي فالحمد لله النتيجة طلعت بان المرة مفخخة ( العفو اقصد حامل بولد )

 

مرة العود وحامل بولد عاد اشتغل الردح على اصوله وحسب الطريقة الاسلامية وشارك بالردح جميع الشباب في المتنزه ( وفريت الكامرة على شباب المتنزه ) على ايقاع مكبرات الصوت مال سيارات المغاوير التي فور سماعها خبر تفخيخ ( العفو حمل ) مرة العود اخذت تبث الاناشيد والابتهالات الوطنية والدينية والحماسية حتى الاخوة المغاوير اخذولهم ردحة ويانة , بالاخير سألت الحجي عن شعورة بهاي المناسبة السعيدة , طبعا الحجي راح يسولفلي قصة مرة ابنة وابنة وشلون ما يصير عدهم جال وماعاناته في مراجعة طبيبات النسائية , فهم ندستة للحجي وكَتلة حجي احنة على الهواء باختصار رأيك بالإجراءات الامنية ؟؟ فلكَفهة ( عالطاير ) الحجي بعد ان خاست خاصرته من الندس !! وعرج بانه يعاهد القيادة بان يكون جندي وفي لخدمة العراق ويشكر القوات الامنية على الخطة وعلى نشر العدد الكافي من اجهزة السونار !!

 

 

 

المشهد الثالث

 

حول انشار الكلاب البوليسية ( طبعا ام العيال بيهة هوفة من الجلاب ) .......

 

فبهاي اللحظة يقاطعني المذيع ( اقصد ام العيال ) بالاستديو ويقول كاظم شكرا لك ونعتذر عن ضيق الوقت ستنضم لنا في نشرات اخرى وتم اذاعة التقرير بعوان

 

(( العراقين المساكين بكلشي راضين وللخطة الامنية شاكرين وبالبيوت كَاعدين وساكتين ))