ملئنا صفحات الانترنت والصحف المطبوعة بكتاباتنا عن التدخل في الشأن الداخلي العراقي

 

حتى اجمع الجميع على ان هذه الظاهرة هي سر مآسي العراقيين خصوصا بعد التغيير الميمون ( لا يختلف اثنان على ذلك ) على اختلاف مشاربنا الايدولوجيا والسياسية او الطائفية او القومية او الحزبية , فالكل يكتب عن التدخلات – هوة وخفة ايدة -

هذا يكتب عن تدخل عربي او خليجي

وهذا يكتب عن تدخل ايراني صفوي مجوسي

وآخر يكتب عن تدخل تركي

وتدخل غربي صليبي كافر

وتدخل شرقي شيوعي ملحد

و البعض عن تدخل اسرائيلي صهيوني

 

حتى اصبحت قائمة التدخلات طويلة بمكان لا يمكن ان تعد او تحصى و صرنا نتحدث عن تدخل منضمات معينة او لوبيات معينة او احزاب خارجية او حتى شخصيات معينة , حتى وصل بنا الحال الحديث عن تدخل قنوات فضائية !! وقد تسمعون مؤخرا تدخل مواقع الكترونية في الشأن العراقي !! من يعلم قد يكتب شخص ان شبكة اخبار الناصرية تتدخل بالشأن العراقي !!

 

المهم كنا نظن ان عملية تدخل دولة بشؤون دولة اخرى ظاهرة غير حضارية وغير منهجية ولا تمت بصلة لأي نظرية سياسية , او هي ناتجة بسبب طغيان ظاهرة الفوضى الخلاقة في بلد ما , هذا ما كنت اعتقده لحين هذه الليلة .

 

الى ان صدر بيان عن احد أعمامنه الكبار بالحكومة الله يحفظه اني مو بصدد ذكر اسمه هنا ولا حتى بصدد نقده او التعرض له – حتى محد يفهمني غلط او يزاود علية – لا اني الي بالبيان مالته شاهد على سالفتنه و موضوعنه , اما فحوى البيان او شخص الرجل مالي علاقة بيه .

 

المهم يكَول البيان ان زيارتنا المرتقبة الى روسيا تأتي وفق :

(( سياسة الابواب المفتوحة ))

طبعا مذيلة هذه العبارة بجملة التي يتبعها العراق

 

ولأننا كنا جالسين بالمقهى حين اذيع هذا البيان , سألني الحجي الكان كَاعد بصفي : يابة شنو هاي السياسة ؟؟ شتعني ؟؟ وشنو ستراتيجياتها ؟؟ شنو تكتيكاتها ؟؟ شنو مبادها ؟؟ وشني فوائدها ؟؟ شنو مضارها ؟؟

 

وكَلت بكَلبي اني شأفتهم من ذني كلهن ؟ يمكن الحجي شيوعي لو دعوجي لان يفتهم بهاي السوالف .

 

فكَتلة حجي والله اني سامع بسياسة الارض المحروقة , سامع بسياسة فرق تسد , سامع كذا , سامع كذا ... بس ما سامع سياسة الابواب المفتوحة , فرد علية الحجي وكَلي : يابة انت مو عندك انترنت واربع وعشرين ساعة لازمة مقالات وكتابات , دة روح دور النه الموضوع افتهملنه الشغلة شني , يمكن الهة علاقة بالكهرباء , لو رواتب المتقاعدين , لو ... لو ... لو , خليته يلولو وكَتله حجي اني اترخص على كَولتك اروح ابحث خل افتهم الفلم شني .

 

بحثت , بحثت , بحثت .... كل معلومة ماكو !!

اقسم لكم بقانون البنى التحتية صدكَوني كلشي ما لكَيت عن هاي السياسة , ولحد الان ما افتهمت منهة شي , بس ها حتى اكون صادق وياكم لكَيت كلمة رديفة هي عبارة عن مثل شعبي مصري مدري بيت شعر لبو معيشي , المهم يكَول

 

(( وكالة من غير بواب ))

 

ولحد الان بعدني ما مفتهم شنو الفرق بين الابواب المفتوحة و وكالة من غير بواب