اتماما لمنظومة الامثال الجديدة , التي اتفقنا سويتا على تحويرها وتطويرها حتى تتلاءم مع الوضع العالمي الجديد و وضع العراق الجديد وتجربته الديمقراطية التي تتنافر كثرا مع طبيعة شعبة القبلية الطائفية القومية والمناطقية , وبصراحة اني واحد من الناس دوما ما القي الآ ئمة على منظومتنا الثقافية المرتبطة دوما بالعشائرية والتي ورثناها من الاجداد , لذا هذا اليوم لدينا مثلين ينبغي ان يتم التحوير لكي تلائم وتنسجم مع العهد الديمقراطي الجديد بالعراق .

 

المثلان هما

( الرحمة فوق القانون )

و

(عفا الله عما سلف )

 

اذا مستعدين ارجو ان تحضروا عدة العمل وتلبسوا البزة الخاصة وتدخلوا الورشة من الباب الواسع وتعينوني على العمل .

من فترة واحنه نسمع بالعراكات والحراكات في برماننا المنتخم حول قانون العفو العام , هذه القانون اللي رهنوا بيه السادة النوام المنتخمون جميع مفاصل الحياة البرلمانية والحكومية التنفيذية فصار واحد يطكَ للثاني سفن من اجل هذا القانون , يعني تعرفوهة بعد ما يحتاج توضيح اكثر – ما يمر قانونك اذا ما تمشي قانوني ولا اصوتلك اذا ما تصوت لي – حتى وصل الامر بان يتم تعطيل قوانين جدا مهمة مثل البنى التحتية ( القانون الوحيد غير الطائفي وغير المحاصصاتي ) فصار هذا القانون هو العباءة التي لا بد ان تمر من تحتها جميع القوانين المحاصصاتية ومنها قانون العفو العام .

 

ولأنه الرحمة فوق القانون , اذا لا بد ان يتم التعجيل بتنفيذ قانون العفو العام حتى وان لم يشرع بصورة قانونية ,, يعني نطبقه هسة باي صورة وبأي طريقة , ويلحكَ علينه القانون , لأنه اصلا هو منطلق من مبادئ الرحمة .

 

والرحمة مثل ما يقول مثلنا الاول فوق القانون , فمو مشكلة اذا نفعوا عن المجرمين والإرهابيين والمدانين بجرائم المثلية وسفاكي المحارم والسراق والسلابة المفسدين .

 

هسة يجي واحد من النوام المنتخمين يريد يضحك على هذا الشعب المسكين ويقول يابة هذولي كلهم ما مشمولين بقانون العفو العام !!

 

جا دادة منو المشمول بهذا القانون الخبصتوا الامة خبص بيه وعطلتوا كل مفاصل الدولة ورهنتوها لهذا القانون علمود منو بالله عليكم ؟؟ , اذا حتى مزوريّ الشهادات حسب ما تقول ما مشمولين بقانون العفو !!!

 

يعني منو اللي راح يشملة العفو حسب قول النائم الغافي حفظه الله وعراه , نقول سعالة النائم يابة روح كمل نومتك لان الشعب مو نايم مثلك , على يا ذقن جاي تضحك ؟ !!

 

قابل راح يشمل قانونكم الي ضربوا الاشارة الضوئية , لو اليسيرون بالطرقات رون سايد !!

 

والحمد لله اشاير ضوئية ماكو بالعراق , والطرق كلهة مقطوعة وجميعها محولة رون سايد ,فأصلا ما عدنة سجناء اشارات ومخالفات مرورية بالعراق , وطبعا هاي يستحق عليها العراق جائزة العفو الدولية ,لانه البلد الوحيد الخالي من سجناء المخالفات المرورية !

 

لعد منو يشملهم القانون ؟؟!! السؤال للمواطن مو لسعالة النائم

 

المهم الجماعة ما صبروا لحين صدور القانون , شلون اصبر على الاه وترك نحيبي واني شفت بسجون شلتي وحبيبي , اذا لا بد من اختراع طريقة لتخليصهم , اولا تتلاءم مع المثل القائل

 

(الرحمة فوق القانون) و ( عفا الله عما سلف )

 

طبعا اكيد هسة انتم هم ملاحظين فد شي ترافق النقاش بهذا القانون , وهو ايضا مشتق من النقاش يسمونة : (( نبش )) نبش تحت السجون من اجل تطبيق فقرات قانون العفو العام بصورة مستعجلة وطارئة , ولذا راح نحور المثل الاول الى

 

((الرحمة قبل القانون ))

 

ها شفتو شلون فرة زغيرة بالمثل صار كلشي جائز , نطلع السلفيين والارهابيين والتكفيريين من السجون قبل صدور قانون العفو .

بعد اكو داعي نهرمل هواي عن محاولات التهريب الناجحة والفاشلة اللي رافقت القانون ابتداء من ابو غريب والناصرية والكوت وديالى .... وليس اخرها صلاح الدين !!

 

يبقى عدنة المثل الثاني لابد من اجراء تحوير بسيط عليه لسببين

الاول : لأنه يكَولك هذا المثل اذا انضرب يعم على صاحبة , مثل ما عم على سابع جار لعبد الكريم قاسم ( فأكو تشاؤم من صيغته ) هاي ناحية

والثاني : حتى يصير اكثر تلائم مع روح عمليات تهريب المجرمين الارهابيين .

 

لذا صوتوا جميعا على تعديله للصيغة الاتية

 

(( عفا الله عن الارهابيين السلفيين ))

 

وأكيد بوجود هذان المثلان راح تصير عملية تنظيف السجون من الارهابيين اكثر مشروعية و من دون الحاجة حتى لقانون عفو عام

 

واخيرا لا بد ان نتذكر ان الامثال المحورة تضرب وتقاس

وهذا المثل عالي الجودة واخر مودة