الامم الشعوب الاوربية ما وصلت الى ما وصلت له الان من تطور صناعي وتكنولوجي وحضاري وقيم مدنية من حريات وحقوق الانسان والحيوان وحرية التعبير والرفاه الاقتصادي إلا حينما استطاعت ان تنسلخ من بعض المفاهيم التي ورثتها من الاسلاف فتجردت عن كل ماضيها السابق من حروب و استعباد وجهل وتسلط الكنيسة , وبدت تفكر بمنظومة مفاهيم جديدة , هذا هو ببساطة سر الرقي الحضاري اللي تعيشه اوربا والغرب الان .
احنة هم لازم نغير بعض المفاهيم الثقافية الموروثة حتى بلكي نصير مثلهم في يوم من الايام .
ولأنه احنة ما عدنة ولا موروث ثقافي بيه خير او ما بيه خير ما عدى الامثال الشعبية التي غالبا اذا احرجتنا نتملص منها بطريقة ناعمة ونقول تضرب ولا تقاس .
من هنا ستكون البداية من اجل التطور والرقي الحضاري
راح نبلش بمثل شعبي و نحوره بحيث يتلاءم مع متطلبات العصر والتغيير ويصبح اكثر توافق مع الدستور مال حمودة والقوانين النافذة , اذا نجحت التجربة عود سجلوا باسمي براعة الاختراع وعلى الشباب حمل رسالة هذا المثل المحور الجديد للعالم كله الذي اصبح كالغرية الصقيرة في ضل العولمة اللي عرتنة وخزتنة امام الامم والشعوب .
مثلنا من العصر القديم هو
(( صبيهة = ﭽبيهة ))
كلكم تعرفون هذا المثل يضرب لبيان ان الامرين متشابهان
بس المشكلة انه هذا المثل من نصدرة للعالم شنكَلهم شنو صبيهة شنو ﭽبيهة , هاي المفردات من العصور الوسطى من ﭽانت امهاتنة ينكَلن الماي من الكَرمة بالبيب وقبلهة اسلافهن بالجرة
والعالم اليوم يحجي بالهيئات والمفوضيات المستقلة والديمقراطية بعصر الغرية الصقيرة
فشراح نسوي احنة المثل مهم عدنة وهمات عدنة هيئات ومفوضيات مستقلة
فراح نجري بعض التغيرات الطفيفة على المفوضيات المستقلة حتى تلائم معنى المثل .
واشهر واهم مفوضية عدنة هي مفوضية الانتخابات اللي تتعامل بصورة مباشرة مع الامم المتحدة والمنظمات الدولية وتعتبر مرآة العملية الديمقراطية بالبلد .
اكيد كلكم تابعتوا نقاشات البرلمان حول مفوضية الانتخابات ابتداء من استجوابها الى التصويت على قانونها و اعضائها
اكيد لاحظتوا كيف ان الاحزاب السياسية نقلت للعالم صورة ولا اروع عن استغلال المفوضية وشلون تم توزيع اعضائها ففتي ففتي بالعدالة بين الاحزاب السياسية .
وحتى ما يفهمنا الغرب خطأ ويقول العراق بلد مو ديمقراطي ومفوضية الانتخابات مسيسة ومستغلة
فذا تطلب ان نروح لليونسكو ونقدم طلب بتغيير لفظ هذا المثل (( صبيهة = ﭽبيهة )) بما يتناسب مع روح العصر ومتطلبات الحداثة والمدنية مع البقاء على نفس المعنى والغرض الذي يضرب من اجله
نقول لهم نريدة يصير :
(( مستقلة = مستغلة ))
ورجاء لحد يسألنيي عن الغين مفتوحة لو مكسورة
فهي مفتوحة على مصراعيها ومكسورة بلا خجل ولا حياء