ذكية منين؟
يم ميتين حسره اليجن كل شهرين
لو فعلا ذكيه تميزي حال الناس
بس انتي غبيه وماكو عندج عين
تنطين البعض راس الشهر سفطات
ومن يوصل سراي استلم بس فلسين
آنه ام اليتامه الوصّه بيهه الله
جا وين العدل والغيره يهل الدين؟
اجيت بلا عشه وريوكَي شربة ماي
وخلّيت بوراي اطفالي جوعانين
تدك بيّه الشمس منتظره ست ساعات
جا ألمن بطاقه اهنا يمسؤولين؟
صدك يالله ابخت من ..ياعداله بهاي؟
مره وجومة جهال تعيش بالميتين
خل ياخذ الراتب مني اي مسؤول
ويصرفه الجهاله يشوفه يكفي اثنين؟
ذكيه منين؟
تردين من اصبعي ايأشر الحاسوب؟
جفوف الفقره خشنه ويبست من اسنين
لتعبين نفسج واضحه البصمات
تطلع بالاشاره جروح محرومين