ياجماعة مرات الحڇي بالعامية يكون ابلغ من الحڇي بالمصطلحات والتفلسف بيهة , ومثل ما يكَول المثل اكَعد عوج واحڇي عدل وهسة شلون ما تعتبروني اعتبروني وصدكّوا اني هسة اكتب ونايم على ظهري يعنس ڇقلمبة المهم اقروا واسمعوا واكتبوا مو مهم تعرف اللي كتب مقال كَعد ورة ميز وبصفة سفطة كتب ومراجع وراه مكتبة طويلة عريضة لو كَاعد بغرفة حواسم على تنكة ومخلي الابتوب على جدر مخسوف لو مثل وضعيتي على برودة الكَاع .
المهم نرجع لموضوع البلاغة مرات واحد يسألك سؤال وكأنه يرفسك رفسة بطنك ويريدك تزوع شماكل اول البارحة , هسة هذا هم تكَعد تتفلسف وياه وتتمنطق وياه لو تكت اللي بمعدتك بشليلة .
اخر ما توصل له الاخوة جماعة سحب الثقة من بحث وتفتيش عن الملفات اللي يريدون يستجوبون الحكومة بيهة , وطبعا هاي برائة اختراع سياسية عراقية اول مرة نسمع عن سحب الثقة وبعدين ندور عن ملفات وقضايا نستجوب وندين بيهة الحكومة يعني كل ذيڇ الهوبزة والربدة مال جمع تواقيع ومؤتمرات اربيل والنجف والموصل بعدها كلهة يطلعلولنة الجماعة يكَولون والله شكلنة لجنة للبحث عن ملفات ممكن ان تصلح لاستجواب الحكومة وادانتهة تمهيد لسحب الثقة , وهية بالحقيقة مو ماكو ملفات بس الظاهر الجماعة يدورون عن ملفات ما يكون لوزرائهم بيه رجل , واكيد ما راح يلكَون أي ملف لان السمڇة خايسة من راسهة , والا ملفات الفساد وسوء الخدمات حمضت ومحد فاتحهة ولا واحد مكَلبهة .
المهم الظاهر هم ما لكَوا ولا ملف اذا ما بيه بصمة لوزير من وزرائهم لو زعيم كتلة من جماعتهم فاخر شي كَالوا : يابة نريد نسحب الثقة عن المالكي لان المالكي بشر وممكن ان يموت !!!
طبعا هذا ما نقله مقدم برنامج بيين قوسين اللي بثتة قناة السومرية في مقابلة مع عباس البياتي , وسالة المقدم كَلة يابة انت شفت مقابلتي وي سلمان الجميلي , أي يابة شفتهة , زين سلمان يكَول ليش ما تبدلون المالكي هسة لنفرض المالكي مات ؟؟
ايباخ والله سؤال فلسفي محير , وملف كولش خطير لازم نسويلة جلسة برلمان استثنائية ونبحث هل المالكي يموت لو لا واذا ثبت انه يموت لازم نبدلة اخاف يكون موته فجاءة وبعدين نحتار شلون اذا مات والبرلمان وزعماء الكتل بعدهم ما مستعدين لاختيار شخص بمكانه , فلازم نبدلة واذا بدلناه هم يطلع النة فيلسوف ثاني ويكَول يابة يمكن هذا الريس هم يموت خل نبدلة , ونضل احنة نبدل رؤساء كل ست ساعت على فرض بالله مات شلون ؟؟
بالله عليكم مثل هيڇ سؤال شنو يكون جوابة ؟؟
عباس البياتي اقترح انه نستنسخة مادام العلم متطور واكو امكانية استنساخ البشر , و هاي هم يرادلهة جلسة برلمان بس ها جلسة بس لجماعة العمايم يفتولنة بجواز استنساخة .
طبعا عباس البياتي وجه الكلام للجميلي وكانت واضحة ملامح السخرية من سؤال الجميلي على وجهه , ولو للاسف اكو بعض الكتاب والمحسوبين على المثقفين اخذو بس جواب عباس البياتي وكَاموا يكتبون على انه امر عظيم اصابنة في تصريح عباس البياتي , متناسين انه جواب عباس البياتي كان بمقام سخرية من اسفح واتفه سؤال .
ومدام الموضوع انفتح على مصراعيه واصبح هذا السؤال اللي وجهة سلمان الجميلي حديث الساعة اني هم اريد اجاوب على هذا السؤال بس مو بطريقة سخرية او هزل واكَولة لسلمان الجميلي اذا مات المالكي نسويلة فاتحة

http://www.youtube.com/watch?v=_9ka6fOBACc