شاعر والاعلامي كريم الجنديل
ضوه البطحاء يانزهان
(قصيدة شعبية مهداة الى روح الشهيد البطل نزهان الجبوري الذي استشهد وهو يدافع عن اخوته الزائرين في محافظة ذي قار)
خبر نصرك
... ينشف ادموعنه الطاحن عليك
او عطشن افعالك

مكسورات خاطر دوم

بس هل مرة
دمعات الفرح يتغاون ابجالك

خبر نصرك ضوه البطحاء

والفايز عراقك بيه موش احزام جتالك

سمار الكَاع بيك ايبوس

والحنطه تهلهل كبرت ابفالك

حويجنته او غترها البيض

وعيون الشريعه اهناك

ظلت ناطره اهلالك

رحتلها ابعلم منصور

فارس ونتحاري اتمرغل اكَبالك

يرفعة راس جيرانك

يرفعة راس خوانك

يرفعة راس ابن عمك يرفعة راس ابن خالك

نهر الزاب

وي شط الحويجه اليوم يتباهون

ولطيور ابعتابه اتغني موالك

(الك بصمه على التاريخ نز هان

ولا شارب عراقي ابيوم نز او هان

وياك ارواحنه بجنان نز هن

ابحب اعراقنه طارن سويه,,,,,,,,,,,,,,,)

سويه او صوت ابوك ايصيح

يطوي الريح
وعكَاله تباهه ابلمة الخوان

هلا يابه هله ابنزهان

هلابك با اخو عثمان

يبن اعبيد يبن اجبور

يبن الجبل يبن الهور

يبن انعيم يبن الهيب

يبن البصره يبن الطيب

هلا بك يابه من رديت

يل خطيت دمك لافته ابذي قار

واحد ياعراق او غيره ما خطيت

اكَضبت بيرغ عمامك غاد ما طخيت

راسك يوم اجاك ارهاب
وتعليت

طول ابطول وي الموت ماذليت

هلا يابه هلابك جيت

يموحد العراق او صيتك ابكل بيت

افتخرو بيك اهل الفاو وهل اربيل

والانبار
وعماره وهَل تكريت

اوكل الناصرية اعليك دمعه اتفور من ضحيت

هلا يابه ,,, يولو اشحلوه بلسانك

و ي جاء الجنوب ابيوم التخاويت

لفيت العدو بذراعك اشلفيت

حزام الناسف ابيمناك ماهميت

اله اتعنيت

راسك راح

تعرف ياهو التلكَاه
جف النبي وهل البيت