اكتبلج قصايد بس بلا عنوان                                       عنوانج امضيعه اشلون اعنونهن
ابيوتي التنكتبلج كلهن بلا باب                                     احتراما لسمج البيبان شايلهن
اخاف امن ارد اسولف بيدي احرك الباب                        جروحج هودن ماريد افززهن
لوله عله الجروح المهدي حتى تنام                              نومهن ابروحه اشلون اكعدهن
اسمج ما اذكره وما اسولف بيه                                   ظل احروفج ارجف لو امر يمهن
الله الكاتب اسمج انه اكتبه شلون                                 احروفج  لحد هسه العرش حاظنهن
حروفج كلب حيدر صار ليهن بيت                                احروف بكلب حيدر سهله اطلعهن
ما ذكرج علن بسمج  ولا اسميج                                 اليتامه التسمع اسمج منو يسكتهن
البنات الشالن اسمج ستر وكت العوز                            بنات ابيوت بس ابيوت ما عدهن
هد دهن العوز ورفع سوط الجوع                                ما صاحن احد صاحن ستر كلهن
الجوع وي الستر مثل الشمر وحسين                           اليحبهن حسين الشمر يكرهن
احجب الساني لازم كبل لا حاجيج                                وحروف القصايد كون احجبهن
بيوتي محجبه ويم بابج مفرعات                                 وعيونج لغيرج ما مفرعهن
ظل الماي ظلج صعبه اوصف بيه                               ومعاني الماي بس الماي يعرفهن
يلطبعج نهر مايزعل ويغتاض                                    دوم اجروفه للعطشان فارشهن
منو الكايل ازغيره وعندي الف اشكال                         الف اشكال عندي ومنو يفندهن
ام انتي لمحمد مو محمد كال                                     احجايات الرسول اشلون نحرفهن
ام حواء انتي ومريم العذراء                                     منو العنده بخت ويكول مو امهن
عمرج عمر حيدر كد عمر جبريل                               كراماتج علي وجبريل يعرفهن
اشكد عندج معاجز وحده لو كل يوم                            سبع اعمار نوح ومانكملهن

 احدث قصيدة للشاعر العراقي المبدع علي الملا الخزاعي بمناسبة ولادة الزهراء عليها السلام