لا أ كــتــب شـــعـــــراّ حــتــى لا أ تـــكــــلـــــم :-
ليل قبض على روح النهار فقتله
وشمس خجولة وضعت كفيها على وجهها ..!
ونصف قمر مهزوم طارده الحوت فأكل نصفه
ونهر بخيل لايبكي على أرضه المسلوبه
وجبان لا يثأر لعصابة أمه
وأب لا يضرب إلا عالدف لاتسأل ماشيمة أهله....
الليل ياخويه قبض روح الصبح
والنهار إباب كل غبشه أنذبح
ما أ سولف ؟ ما ردت سر ينفضح
لكن أسمع كل حجيهم بلايه ملح
ولذلك راح أسولف راح أورجك عالجرح

راح أكلك جرحي شارع !! إبلايه رصيف
وجي يظل ينزف جنابر كالوا أزعجنه النزيف
وراح أكلك جرحي عيد ! عيد يسكر بالدموع الحايره بعين اليتامى
وجرحي كل أم للنخل زفت شهيد أيلقح عثوك الكرامه
وجرحي مجلس للعزاء بنصه مذبوحه إبتسامه

وجرحي ليل .....عالسهر والنوح ضامي
ليل يفضح كل ينام وفج عباته يريد يستر كل حرامي
وجرحي أخوي الجاب سيفه أبكلبي ضمه
وماطلع من عندي دم .. كلب أخوي السال دمه
وجرحي أمي تكول يمه أنطيني صدرك خل أشمه

وآني أكلهه يمه يمج صدر أخوي ماردتهه تشوف نابت بيه سيف
وهد أخوي وكال أقاوم عن بلادي
أنطيني سيفي ... كتله أموت
كال موت ..تموت عادي
المهم أنصر ...... بلادي
والنتائج ........ هذا معروف بنهاية كل حرب
أله ماتدرون في معركة أخوي
في بدايته أنحسم نصر الاعادي
جي صرت بيده قتيل ولأمي ظل بس العويل...وهيه تنعه ...!!
دلي اللول يالولد يبني دلي اللول ...يمه بسيف أخوك شلون مقتول